ദാരിക നിഗ്രഹാർത്ഥം ശിവന്റെ മൂന്നാം തൃക്കണ്ണിൽനിന്നും പിറവികൊണ്ടവളാണ് ദേവി. രാമരാവണ യുദ്ധത്തിന്റെ മഹിമ കേട്ടറിഞ്ഞ ദേവി യുദ്ധം നേരിൽ കാണാനാവാത്തതിന്റെ നിരാശ ശിവനെ അറിയിക്കുന്നു. കലിയുഗകാലത്ത് നിന്റെ തിരുനടയിൽ രാമരാവണയുദ്ധം നിഴൽ നാടകരൂപത്തിൽ അവതരിപ്പിക്കപ്പെടുമെന്നും, അവിടെ നിനക്കതു കാണാനാകുമെന്നും ശിവൻ അനുഗ്രഹിക്കുന്നു. ആ വരദാനമാണ് കമ്പരാമായണത്തെ അടിസ്ഥാനമാക്കിയുള്ള തോൽപ്പാവക്കൂത്ത്. ദേവിയുടെ വടക്കുഭാഗത്ത് നിർമ്മിച്ച കൂത്തുമാടത്തിൽ പൂരമഹോത്സവകാലത്ത് നിത്യേന നടന്നുവരുന്നു.